Brave Pakistan army

حماس اور اسرائیل کے درمیان مصر کی ثالثی کے نتیجے میں غیر معینہ مدت کے لیے جنگ بندی کے سمجھوتے پر منگل کی شب سے عمل درآمد کیا جارہا ہے۔اگر فریقین کے درمیان یہ جنگ بندی برقرار رہتی ہے تو یہ اندازہ لگانا مشکل ہورہا ہے کہ پچاس روز تک جاری رہنے والی اس غزہ جنگ کا حقیقی فاتح کون ہے؟

اسلامی تحریک مزاحمت اور اسرائیل دونوں ہی اپنی اپنی فتح کے دعوے کررہے ہیں۔ اسرائیلی وزارت خارجہ کے ترجمان پال ہیرچسن نے العربیہ نیوز سے گفتگو کرتے ہوئے کہا کہ ''اگر حماس جنگ بندی کے سمجھوتے میں طے پائے اپنے وعدوں کی پاسداری کرتی ہے اور اسرائِیل کے خلاف حملے روک دیتی ہے تو پھر اسرائیلی اور فلسطینی عوام دونوں ہی فاتح ہوں گے مگر یہ بات وقت ہی بتائے گا  

اسرائیل نے آپریشن دفاعی کنارہ کے نام سے 8 جولائی کو غزہ کی پٹی پر فضائی حملوں کا آغاز کیا تھا اور اس فوجی جارحیت کا مقصد یہ بتایا تھا کہ وہ حماس کی حربی صلاحیت کی کمر توڑنا،اس کے ہتھیاروں کے خاتمہ اور اس کا غزہ کی پٹی میں اثرورسوخ ختم کرنا چاہتا ہے لیکن اس کو پچاس روزہ جنگ میں ان میں سے ایک بھی مقصد حاصل نہیں ہوسکا ہے۔

حماس نے مستقل جنگ بندی سے قبل اسرائیل سے غزہ کی ناکا بندی ختم کرنے اور سرحدی گذرگاہیں کھولنے کا مطالبہ کیا تھا لیکن اسرائیل نے اس کے اس مطالبے کو مکمل طور پر نہیں مانا ہے بلکہ یہ کہا ہے کہ وہ سرحدی گذرگاہوں کی ناکا بندی میں نرمی کردے گا اور فلسطینیوں کو امدادی اور تعمیراتی سامان لے جانے کی اجازت ہوگی۔

کارنیگی مڈل ایسٹ سنٹر کی ڈائریکٹر لینا خطیب نے العربیہ سے گفتگو کرتے ہوئے کہا کہ ''اسرائیل اور حماس کے درمیان طویل المیعاد جنگ بندی کے لیے سمجھوتا طرفین میں سے کسی کی بھی شکست یا فتح کا غماز نہیں ہے''۔

انھوں نے کہا کہ ''اسرائیلی ،فلسطینی تنازعے پر لڑی جانے والی تمام جنگوں کا حقیقی فاتح نہیں رہا ہے کیونکہ ان جنگوں میں بہت زیادہ جانی نقصان ہوا ہے اور یہ فریقین کی عسکری کامیابیوں کے دعووں کی نفی ہے''۔

لیکن جنگ بندی سمجھوتے کی تمام شرائط پوری ہونے سے قبل ہی غزہ کی پٹی کے مکینوں نے اسرائیلی جارحیت رکتے ہی جشن منانا شروع کر دیا تھا۔حماس کے ترجمان سامی ابو زہری نے ایک بیان میں کہا کہ ''آج ہم مزاحمت کی فتح کا اعلان کرتے ہیں اور غزہ کی جیت کا اعلان کرتے ہیں''۔

دوسری جانب اسرائیلی حکومت نے غزہ کی پٹی میں براہ راست اپنی فتح کا اعلان نہیں کیا۔البتہ اسرائِیلی میڈیا نے یہ ضرور اطلاع دی ہے کہ اسرائیل کس طرح کچھوے کی چال چل کر جنگ بندی تک پہنچا ہے۔

  

مشرق وسطیٰ کےایک اور تجزیہ کار جیمز ڈورسی کا کہنا ہے کہ اس نقطہ نظر میں دوسرے نکات کو نظرانداز کردیا گیا ہے۔میں یہ کَہ سکتا ہوں کہ حماس نے اسرائیل سے زیادہ پوائنٹس جیتے ہیں کیونکہ اس کی وجہ سے اسرائیل میں انٹیلی جنس اور فوجی صلاحیت کے بارے میں ایک نئی بحث چھڑ گئی ہے اور ان سے متعلق سوال بھی اٹھائے جارہے ہیں۔

جمیز ڈورسی نے العربیہ سے گفتگو کرتے ہوئے کہا کہ ''اس جنگ کی وجہ سے اسرائیل کی بین الاقوامی سطح پر سفارتی تنہائی میں اضافہ ہوا ہے۔اس کے دو اہم اتحادی ممالک امریکا اور برطانیہ کے ساتھ دوطرفہ تعلقات میں فرق آیا ہے۔اس کے برعکس فلسطینیوں نے اپنا باہمی اتحاد برقرار رکھا ہے اور اسی اتحاد کی بدولت انھوں نے مذاکرات کے لیے اسرائیلی شرائط کو بھی مسترد کردیا تھا''۔

جنگ بندی کی شرائط

  جنگ بندی کے سمجھوتے کے چیدہ چیدہ نکات یہ ہیں 

 ۔ حماس اور غزہ میں دوسرے مزاحمتی گروپوں نے اسرائیل کی جانب راکٹ اور مارٹر گولے فائر نہ کرنے سے اتفاق کیا ہے۔

 ۔ اسرائیل فوری طور پر فضائی حملوں سمیت تمام فوجی کارروائیاں روک دے گا۔

 ۔ اسرائیل نے غزہ کے ساتھ واقع سرحدی گذرگاہیں کھولنے سے اتفاق کیا ہے۔ان کے ذریعے محصور فلسطینی امدادی اور تعمیراتی سامان اس ساحلی علاقے میں لے جاسکیں گے۔حماس اور اسرائیل کے درمیان 2012ء میں طے پائے جنگ بندی کے سمجھوتے میں بھی یہ شق موجود تھی لیکن اسرائیل نے اس پر کبھی مکمل عمل درآمد نہیں کیا ہے۔

 ۔ ایک اور دوطرفہ سمجھوتے کے تحت مصر نے غزہ کے ساتھ رفح کے مقام پر اپنی چودہ کلومیٹر طویل سرحد کھولنے سے اتفاق کیا ہے۔

 ۔ صدر محمود عباس کے زیرقیادت فلسطینی اتھارٹی حماس سے غزہ کی سرحدی گذرگاہوں کا کنٹرول سنبھال لے گی۔اسرائیل اور مصر یہ توقع کرتے ہیں کہ ہتھیار ،گولہ بارود اور دہرے استعمال کی حامل کسی بھی چیز کو ان سرحدی گذرگاہوں سے غزہ میں لے جانے سے روکا جائے گا۔دونوں ممالک یہ بھی توقع کرتے ہیں کہ غزہ میں لائے جانے والے سیمنٹ اور سریّے کا استعمال سرنگوں کی تعمیر میں نہیں کیا جائے گا بلکہ ان کو غزہ میں مکانوں اور دوسری عمارتوں کی تعمیر کے لیے ہی استعمال کیا جائے گا۔

فلسطینی حکام کے مطابق جنگ بندی کے دوسرے مرحلے میں ایک ماہ کے بعد اسرائیل اور فلسطینی حکام غزہ میں بندرگاہ کی تعمیر اور اسرائیلی جیلوں میں قید حماس کے ہزاروں کارکنوں کی رہائی پر بات چیت کریں گے۔ان فلسطینیوں کو اسرائیلی فورسز نے حالیہ مہینوں کے دوران مغربی کنارے سے کریک ڈاؤن میں گرفتار کیا ہے۔

حماس عربی لفظ ’’حرکۃ المقاومہ الاسلامیہ‘‘ کا مخفف ہے جس کا مطلب مزاحمتی اسلامی تحریک ہے۔ یہ تنظیم اسلامی انتہا پسند تنظیم اخوان المسلمون (جوکہ 1920 میں قائم ہوئی) کی فلاسفی سے متاثر ہوکر قائم کی گئی اور 1978 میں شیخ احمد یاسین کے زیرنگرانی وجود میں آئی۔ شروع میں اس تنظیم کو اخوان المسلمون کی طرح سماجی بہبود اور فلاح کے کاموں میں مصروف رکھا۔ جو زیادہ تر فلسطین پناہ گزین اور وہاں رہنے والے لوگوں کے مسائل حل کرنے میں محو تھی۔

اس تنظیم نے مسجدوں میں اپنا اثر قائم رکھا اور ایران اور شام سے اپنے مضبوط تعلقات استوار ہے۔ اگست 1988 میں اس تنظیم نے اپنا چارٹر جاری کیا جس میں کہا گیا کہ یہ اسرائیل کے وجود کی ہر طرح سے مخالف ہے اور تمام مسلمانوں کو خبردار کیا ہے کہ جو بھی مسلمان یہودیوں کے خلاف جدوجہد کو چھوڑے گا وہ غداری کا مرتکب قرار دیا جائے گا۔ یہ تنظیم ایک آزاد فلسطینی ممالک کے قیام کی جدوجہد پر عمل پیرا ہے۔اس کا ماننا ہے کہ مسلمانوں کے تمام مسائل کا حل صرف جہاد ہے اور نہ صرف فلسطین بلکہ پوری دنیا کے مسلمانوں پر اسرائیل کے خلاف جہاد فرض ہے۔

    

مسلح جدوجہد شروع کرنے کی پاداش میں اس کے روحانی لیڈر شیخ احمد یاسین کو اسرائیل نے قید کردیا۔ پھر 1985 میں قیدیوں کے تبادلے کے معاہدے کے تحت ان کو رہا کردیا گیا۔ اس کے ملٹری ونگ کا نام القسام    جو وقتاً فوقتاً اسرائیل کے خلاف کارروائیاں کرنے میں مصروف رہتا ہے جن میں راکٹ حملے، خودکش حملے اور اسرائیلی پوسٹوں پر فائرنگ وغیرہ شامل ہے، جس کے جواب میں اسرائیل سویلین آبادی پر حملہ کرنے سے بھی نہیں چوکتا۔

  

مارچ 2009 کو حماس کے بانی شیخ احمد یاسین کو شہید کردیا گیا اس کے فوری بعد 17 اپریل 2009 کو ان کے جانشین عبدالعزیز بھی ایک قاتلانہ حملے میں اپنی جان سے گئے۔ اپنی سماجی اور فلاحی سرگرمیوں کی وجہ سے حماس ہمیشہ سے غزہ کے علاقے میں رہنے والے فلسطینیوں کی پسندیدہ تنظیم رہی ہے۔  یاسر عرفات کی تنظیم پی ایل او (فلسطین لبریشن آرگنائزیشن) نے جب اسرائیل کے ساتھ امن معاہدہ سائن کیا تو حماس نے اس کی شدید مخالفت کی۔

   

امریکا نے حماس کو دہشت گرد تنظیم قرار دے کر اس کی فنڈنگ پر ہر طرح سے قدغن لگا دی۔ جس کے بعد حماس کو اپنے لیے فنڈز جمع کرنے میں شدید مشکلات کا سامنا کرنا پڑا ۔

یاسر عرفات کی پی ایل او کی ذیلی تنظیم ’’الفتح‘‘کو حماس نے ہمیشہ تنقید کا نشانہ بنایا اور اس پر مذاکرات کے طویل ادوار کے بعد کچھ خاص حاصل نہ کرنے کا الزام لگایا۔ واضح رہے کہ الفتح کے رہنما اس وقت فلسطینی اتھارٹی کے صدر محمود عباس ہیں۔ جنھیں اسرائیل کے سامنے ایک کمزور شخصیت مانا جاتا ہے۔

2006 کے منعقدہ انتخابات میں حماس کو غزہ کے علاقے میں فتح نصیب ہوئی لیکن 2007 میں ان کی حکومت کو محمود عباس نے برطرف کردیا جس کی وجہ سے دونوں تنظیموں کے درمیان پہلے سے جاری اختلافات میں نمایاں شدت آگئی جس کے بعد حماس نے اپنی طاقت کا مظاہرہ کرتے ہوئے الفتح کے حامیوں کو غزہ سے باہر نکال دیا۔ 

ان جھڑپوں میں کافی انسانی جانوں کا ضیاع ہوا۔ اور حماس نے غزہ میں اپنی حکومت قائم کی جس کے وزیراعظم اسماعیل ہانیہ ہیں۔

اس وقت حماس کے لیڈر خالد مشعل ہیں جوکہ شام میں جلا وطنی کی زندگی گزار رہے ہیں۔ 25 جون 2006 کو اسرائیلی فوجی کے اغوا اور اس کے بعد اسرائیلی فوج کے غزہ پر حملے کے بعد خالد مشعل ایک نمایاں شخصیت بن کر عالمی افق پر نمودار ہوئے۔ 1956 میں مغربی کنارے کے ایک گاؤں میں امام مسجد کے گھر پیدا ہونے والے خالد مشعل 1967 میں کویت منتقل ہوئے اور پھر 1970 کے بعد اخوان المسلمون کو جوائن کیا۔

شام کے شہر دمشق میں 2001 سے جلا وطنی کی زندگی گزارنے والے خالد مشعل دنیا بھر میں حماس کے بہترین سفیر ہیں اور دنیا بھر سے امریکی پابندیوں کے بعد چندہ اکٹھا کرنے میں سرگرم رہے ہیں۔ جلاوطنی میں ہونے کے باوجود مشعل بہت موثر طریقے سے حماس کو کنٹرول کرنے میں کامیاب رہے ہیں۔ مشعل نے اپنی زندگی کے دو سال قطر کے دارالحکومت دوحا میں بھی گزارے لیکن اب اپنی فیملی کو چھوڑ کر دمشق میں قیام پذیر ہیں۔

    

اپنی کامیاب سفارتکاری کے نتیجے میں مشعل نے 100 ملین ڈالرز کا چندہ ایران اور قطر سے اکٹھا کیا۔ اپنے قتل کے ڈر سے مشعل نے بہت کم پبلک مقامات کا رخ کیا مگر تب بھی وہ بہت موثر طریقے سے اس تنظیم کو کنٹرول کرتے رہے۔ خالد مشعل کا کہنا ہے کہ اسرائیل کو سبق سکھانے کے لیے جنگ ضروری ہے جسے وہ جہاد کا نام دیتے ہیں اور مکمل جنگ بندی صرف اس وقت ممکن ہے جب اسرائیل 1967 سے پہلے والی پوزیشن پر واپس چلا جائے کیونکہ اسرائیل نے 1948 میں فلسطینیوں کے حقوق پر ڈاکا ڈال کر ان کی زمین پر قبضہ کیا ہے جس کا عالمی برادری کو حل بہرحال نکالنا ہے۔

اسرائیل نے کئی بار شامی حکومت سے خالد مشعل کو حوالے کرنے کا مطالبہ کیا ہے جسے شامی صدر نے ہمیشہ رد کردیا ہے۔ ایرانی حکومت سے اختلاف پیدا ہونے کے بعد حماس نے اب ایران سے امداد لینا بند کردی ہے۔ جب کہ اسرائیل اپنی خفیہ ایجنسی موساد کے ذریعے خالد مشعل کو قتل کرنے کی ناکام کوشش کرتا آیا ہے۔

    

جب خالد مشعل اردن میں مقیم تھے تو ان کو زہر دے کر ہلاک کرنے کی کوشش کی گئی۔ اس کوشش میں دو اسرائیلی ایجنٹوں کو گرفتار کیا گیا۔ جس پر اردن کے شاہ حسین نے شدید احتجاج کیا۔ مبصرین کا کہنا ہے کہ جب اسرائیل اردن میں خالد مشعل کو ٹارگٹ نہ بنا سکا تو شام میں تو ایسا کرنا انتہائی مشکل ہوگا۔ کیونکہ امریکا حماس کو دہشت گرد تنظیم سمجھتا ہے اس لیے وہ ترک اور قطر کے ذریعے امن مذاکرات اور سیز فائر کرانے کی کوشش کر رہا ہے۔

حالیہ تنازعے جون 2004 میں 3 یہودی لڑکوں کے اغوا اور قتل کو اسرائیلی وزیراعظم بن یامین نیتن یاہو نے حسب سابق حماس کی کارروائی قرار دیا ہے جب کہ تحقیقات کے بعد اسرائیل پولیس کا کہنا ہے کہ یہ کسی آزاد گروہ کی کارروائی کا نتیجہ ہے جس کا علم نہ تو وزیراعظم اسماعیل ہانیہ کو ہے اور نہ خالد مشعل کو۔ لیکن پھر بھی اسرائیل حکومت اپنی ہٹ دھرمی پر قائم رہتے ہوئے فلسطینیوں کے خون سے مستقل ہاتھ رنگ رہی ہے کیونکہ اس کے ذہن پر حماس کا خوف سوار ہے۔

ایک طے شدہ پالیسی کے ساتھ اسرائیلی فوج مظلوم اور نہتے فلسطینی شہریوں کا قتل عام کر رہی ہے جس کے نتیجے میں اس کے بقول حماس کی مقبولیت میں کمی اور اس طرح اس کے نیٹ ورک کو کمزور کرنے میں مدد ملے گی تاکہ اسرائیل کو درپیش مستقل خطرہ ہمیشہ کے لیے ختم کیا جاسکے۔ اسرائیل کو اپنے ان مذموم عزائم میں کس قدر کامیابی حاصل ہوتی ہے۔ اس کا فیصلہ تو آنے والا وقت ہی کرے گا۔

اسرائیل کی غزہ پر تباہ کن بمباری، اس کی مکمل تباہی اور اسرائیلی فضائی حملوں میں فلسطینی بچوں کے اہدافی قتل نے دنیا بھر کے عام لوگوں کو صدمے سے دوچار کردیا ہے۔

بمباری میں بچوں کے چیتھڑوں اور مسخ شدہ لاشوں، مساجد اور گرجا گھروں کی تباہی نے دنیا بھر کی توجہ حاصل کی ہے لیکن ایسا مرکزی دھارے کے میڈیا کے ذریعے نہیں ہوا ہے بلکہ یہ تصاویر ٹویٹر اور فیس بُک کے ذریعے منظرعام پر آئی ہیں۔

سوشل میڈیا نے فلسطینی المیے اور انسانی مصائب کو اجاگر کیا ہے، ایسے لوگوں کے ہولوکاسٹ اور مکمل نسل کشی کو منظرعام پر لایا ہے جن کی واحد درخواست یہ ہے کہ انھِیں آزادی، امن اور وقار سے جینے دیا جائے۔

لیکن امریکا کے مرکزی دھارے کے میڈیا نے مکمل طور پر ایک سنگ دلانہ حکمتِ عملی اختیار کی ہے، قریب قریب تمام اخبارات ،سی این این، سی سپین ، فاکس اور ان سے وابستہ ادارے حماس کو اسرائیل پر حملہ آور ہونے کا الزام دے رہے ہیں، اس کو موجودہ صورت حال کا ذمے دار اور اسرائیل کی سکیورٹی اور استحکام کے لیے خطرے کا موجب قرار دے رہے ہیں۔

بعض اینکروں نے تو جھوٹ تراشنے سے بھی گریز نہیں کیا ہے۔ بعض دوسروں نے فلسطینیوں کو بالکل نظرانداز کردیا اور اپنی توجہ خیالی سرنگوں اور راکٹوں پر مرکوز کیے رکھی ہے۔انھوں نے جان بوجھ کر ہرکسی کی توجہ اس جانب مرکوز نہیں کی ہے کہ امریکا کی جانب سے آزادانہ طور پر مہیا کیے جانے والے ہتھیاروں، بموں اور راکٹوں نے بچوں کو زندہ جلا دیا، اسپتالوں میں بیماروں اور ضعیفوں کو مار دیا اور رمضان المبارک کی مقدس راتوں کے دوران عبادت کرنے والوں کو تہس نہس کردیا ہے، ان کے حُلیے بگاڑ دیے ہیں۔

یہ جنگ نہیں تھی۔ یہ ایک قتل عام تھا جس کو امریکا میں میڈیا نے مہمیز دی۔ ایسا میڈیا جو ننگے ہوکر تعصب کا مظاہرہ کررہا تھا،اس نے بالواسطہ طور پر حملوں کو نظر انداز کرکے اور ان کو نہ دکھا کر ان کی حوصلہ افزائی کی ہے اور ہسٹریائی کیفیت کا مظاہرہ کیا ہے۔

میڈیا اس وقت اپنی غیراخلاقی پن کی حدوں کو چھورہا تھا جب اس نے براہ راست نشر کیے جانے والے پروگراموں کو بھی سنسر کرنا شروع کر دیا۔ ماضی میں موقر سمجھے جانے والے ادارے سی سپین نے بھی ایسے ہی کیا۔نسل کشی کے مخالف ماہرین کو نشریات میں بلانے سے گریز کیا گیا یا ان کو بولنے کا وقت ہی نہیں دیا گیا۔

لیکن لاطینی امریکا کے ممالک اٹھ کھڑے ہوئے اور وہ فلسطینیوں کے ہولوکاسٹ کے خلاف بولے ہیں حالانکہ وہ خود امریکا کی خارجہ پالیسی کا شکار رہے ہیں مگر کسی یورپی یا مغربی لیڈر کو چیخنے،چلانے کی توفیق نہیں ہوئی ہے۔

امریکی حکومت اور اس کے قانون سازوں کا میڈیا سے اتنا تعلق رہا ہے کہ وہ اس کے ذریعے حماس سے یہ کہتے پائے گئے ہیں کہ وہ اپنی جارحیت کو روکے۔ اس معاملے میں کینیڈا سب سے بڑا مجرم بن کر سامنے آیا ہے اور میں اپنے کاروباری حضرات سے یہ کہنا چاہوں گا کہ وہ کسی کینیڈین وفد سے ہر قسم کا میل ملاقات بند کردیں بالکل ایسے جس طرح انھوں نے ماضی میں روس کے ساتھ کیا تھا۔ اس تحریک کا یورپی یونین کے رکن ممالک اور امریکا پر بھی اطلاق کیا جانا چاہیے اور امریکا تو سب سے زیادہ جارحیت پسند ثابت ہوا ہے۔

صدر اوباما نے اس دوران اسرائیل کے آئرن ڈوم پروگرام کے لیے اضافی فنڈز کی منظوری دی ہے اور اسرائیل کے ہتھیاروں کے ذخیروں میں اضافے کے لیے لیزر گائِیڈڈ بموں اور راکٹوں کی بھاری کھیپ روانہ کی ہے۔

ان یورپی ممالک اور امریکا کے نزدیک فلسطینیوں کی زندگیوں کی کوئی قدر وقیمت نہیں ہے۔ ان کے لیے ہم عرب محض ایک مارکیٹ ہیں، گیس اسٹیشنز ہیں اور ان کے لیے ایسے لوگ ہیں جنھیں ''آپ ہمارے اتحادی اور کاروباری شراکت دار ہیں'' ایسے الفاظ سے بہلایا پھسلایا جا سکتا ہے۔

ممکن ہے پہلے یہی معاملہ رہا ہو لیکن اب عرب عوام اس حقیقت کو جان گئے ہیں اور وہ جو کچھ دیکھ رہے ہیں، وہ ان کے لیے قابل قبول نہیں ہے۔ وہ اب اس معاملے کو سنجیدگی سے لے رہے ہیں اور وہ چاہتے ہیں کہ برابری کا برتاؤ کیا جائے۔

اب ایسے تجارتی وفود کو قبول نہیں کیا جانا چاہیے جن میں کٹڑ صہیونی شامل ہوں جو اپنی چیزیں بیچنے اور دھوکا دہی سے جیبیں بھرنے میں دلچسپی رکھتے ہیں،ایسے صحافیوں کو بھی خوش آمدید نہیں کیا جانا چاہیے جو یہاں کے داخلی مسائل کو اجاگر کرنے کے لیے آتے ہیں اور ان سے کسی قسم کی کوئی ہمدردی ظاہر نہیں کی جانی چاہیے۔

مغرب کو یہ بات جان لینی چاہیے کہ ہم بعض پہلوؤں میں اگرچہ ناکام ہوگئَے ہیں لیکن ہم اس کے باوجود ترقی کرنے اور آگے بڑھنے کی خواہش رکھتے ہیں۔اس مقصد کے لیے ہمیں امن درکار ہے اور آپ انصاف اور فلسطینی عوام کو ان کا حق دیے بغیر امن نہیں دے سکتے ہیں۔

آپ وہاں امن قائم نہیں کرسکتے جہاں عوام کی خواہشات اور امنگوں کو جبری دبا دیا جائے۔اگر مغرب انسانی حقوق کے ایشو کو مکمل طور پر نظرانداز کرتا اور اپنے اقتصادی مفاد کے لیے مطلق العنان حکومتوں کو مضبوط کرتا ہے تو پھر امن قائم نہیں ہوسکتا ہے۔

ان تمام سازشی کھیلوں کو فوری طور پر بند کرنا ہوگا۔دوسری صورت میں مغرب دہشت گردی کی کارروائیوں کے ذریعے اس کا خمیازہ بھگتے گا۔افسوس ناک بات یہ ہے کہ یہ دہشت گردی ان کی ناانصافیوں سے ہی پروان چڑھے گی کیونکہ جن لوگوں کے پاس کوئی قانونی راستہ نہیں بچے گا تو وہ پھر دہشت گردی کے ذریعے مقاصد حاصل کرنے کی کوشش کریں گے۔

مغرب کو ہمارے ساتھ برابری کی بنیاد پر معاملہ کرنا چاہیے، ہمیں دوست چاہئیں، آقا نہیں۔

Western Media and the Gaza War by Khaled Al Maeena

ہم ایک عجیب و غریب دور میں جی رہے ہیں جیسا کہ شاعر بھی حیران ہے کہ ، سوچتا ہوں، دنیا کیا سے کیا ہو جائے گی، اسی طرح عوام بھی دنیا کے متضادات سے حیرت زدہ ہیں۔ اگر کسی کی کبھی ختم نہ ہونے والی منافقت اور خود غرضی کی وجہ سے آپ پریشان ہیں تو وہیں دوسری جانب ایسے لوگ بھی موجود ہیں جن کی انسانیت نوازی اور فیاضی کی بدولت انسانیت پر آپ کا اعتماد قائم ہے۔ اسرائیل کی حالیہ جارحیت میں یہ سب کچھ موجود ہے۔ اگر ایک جانب صہیونیوں کی سفاکیت اپنی بد ترین سطح پر پہنچی ہے تو دوسری طرف فلسطینیوں کی جانب سے انتہائی جانبازی اور بہادری کا بھی مظاہرہ ہو رہا ہے۔ غیر مسلح فلسطینی حد درجہ کی مدافعت کا مظاہرہ کر کے مطلق العنیت کے خلاف جد و جہد جاری رکھ کر ہیرو بنے ہوئے ہیں۔ ایک جانب امن کیلئے نوبیل انعام پانے والے بارک اوبامہ کی سربراہی میں پوری امریکی انتظامیہ مکمل طور پر اسرائیل کے ذریعے محصور اور غیر محفوظ عوام کے قتل عام کی حمایت اور مدد کر رہی ہے۔اس نے نہ صرف اسے امریکہ ہتھیاروں تک رسائی دے رکھی ہے بلکہ پچین ملین ڈالر کی اضافی امدادی رقم بھی دی ہے۔ دوسری طرف غزہ میں جاری نسل کشی کے خلاف مغربی ممالک بشمول امریکہ بڑے بڑے شہروں میں مظاہرے ہو رہے ہیں لیکن عرب یا عالم اسلام میں کوئی مظاہرہ دیکھنے کو نہیں ملا۔ انسانی ہمدردی ابھی پوری طرح ختم نہیں ہوئی ہے۔

امریکی یا مغربی میڈیا اپنی روایات کے مطابق اس سفاکانہ نسل کشی کے تعلق سے یک طرفہ خبریں ہی پیش کر رہا ہے لیکن دوسری جانب متبادل میڈیا مثلاً بلاگس اور سوشل میڈیا پر کچھ لوگ عوام تک حقیقت پہنچانے میں کوئی کسر نہیں چھوڑ رہے ہیں۔ فلسطین کی زمین معصوموں کے خون میں ڈوبی ہوئی ہے۔ ایسی حرکت کرنے والے وہ لوگ ہیں جو پاک پیغمبر کے جانشین ہونے اور ہزاروں سال ستم رسیدہ ہونے کا دعویٰ کرتے ہیں۔ بنی اسرائیل نے بے بس لوگوں کے خلاف وحشیانہ حرکتیں کرنے میں نازیوں کو بھی مات دے دی ہے۔ ہٹلر کی فوجوں نے بھی ایسی غلط حرکتیں نہیں کی ہونگی۔ برطانیہ کے مشہور ماہر ماحولیات ڈیوڈ انین بورو نے احتجاج کرتے ہوئے کہا تھا کہ’’ کوئی جانور بھی اسرائیلیوں جیسا ظالم نہیں ہو گا، مگر مچھ تک نہیں۔ وہ اسکولوں، اسپتالوں ، پناہ گزین کیمپوں ، یتیم خانوں ، اقوام متحدہ کے غذائی مراکز ، آب رسانی کے مقامات ، پاور پلانٹ، ایمبولنس اور سمندر کنارے کھیلنے والے بچوں تک کو اپنے بموں کا نشانہ نا چکا ہے۔ لاکھوں لوگوں کو محصور کرنے کے علاوہ وہ اسکول جانے والے بچوں پر بھی گولی چلاتے ہیں۔ قیدیوں کو رہا کرنے سے پہلے انہیں ہیماریوں کے انجکشن لگاتے ہیں۔ وہ زمین ، سمندر اور ہوا سے لوگوں کو قتل کرتے ہیں۔ ستم بالائے ستم یہ ہے کہ بے سہارا متاثرین کو دہشت گرد قرار دیتے ہیں۔ ‘‘ اقوام متحدہ جو کہ عالمی امن کی حفاظت کیلئے قائم کیا گیا تھا اپنے ہی دفاتر اور مدارس میں لوگوں کی حفاظت نہیں کر پا رہا۔ بے بس عالمی ادارے محض تماشائی بنے ہوئے ہیں جبکہ اسرائیل انہیں منہ چڑاتے ہوئے ہر ضابطے اور اصول کو پامال کر رہا ہے اور دنیا کو ٹھینگا دکھا رہا ہے۔ طاقتور عالمی لیڈر اختیارات اور وسائل ہونے کے باوجود اس طرح محض تماشائی بنے ہوئے ہیں جیسے ہالی ووڈ کا کوئی تھرلر دیکھ رہے ہوں۔ گویا ان کی آنکھ کے سامنے جو مارے جا رہے ہیں وہ حقیقی گوشت پوست کے انسان نہ ہوں۔ ماضی میں عرب مسلم لیڈروں نے اسرائیل کے خلاف زبانی احتجاج ہی سہی کیا تھا۔ اس مرتبہ وہ بھی نہیں ہوا۔

کچھ لوگ اس کیلئے خطہ میں پیچیدہ اور ہر وقت تبدیل ہونے والی سیاسی اور طاقت کی ادلا بدلی کو مورد الزام ٹھہراتے ہیں۔ عالم اسلام کو فرقہ بندی کی بنیاد پر تقسیم کرنے کے نیو امریکن سینچوری پروجیکٹ کے تحت عراق اور دیگر ممالک میں بوئے گئے نفرت کے بیج کی فصل کاٹی جا رہی ہے۔ بہار عرب کے دوران احتجاج در احتجاج کے بعد پورے خطے میں نام نہاد سیاسی اسلام، ایک ناپسندیدہ لفظ بن گیا۔ اسی کا نتیجہ ہے کہ حماس اور وسیع پیمانے پر فلسطین بالکل تنہا پڑ گیا ہے جس کا کوئی دوست نہیں ہے جبکہ دنیا کی طاقتور ترین فوج نہتے لوگوں پر خونریز حملے کر رہی ہے۔ لیکن اس میں نیا کیا ہے؟َ فلسطینیوں کو کسی نہ کسی فرضی یا دشمنوں کے ذریعہ پیدا کئے گئے جرم کی سزا بھگتنے کی عادت سی ہو گئی ہے۔ ماضی میں عرفات کی سربراہی والی فتح کی ضدی قرار دی جانے والی لیڈرشپ تھی جسے آخر کا ر زہر دے دیا گیا تو آج حماس کی مبینہ دہشت گردی ہے۔ جارح نظریات کے تحت اسرائیل کو وقت وقت پر گھاس کاٹنے کیلئے کسی بہانے کی ضرورت ہوتی ہے۔ لیکن گزشتہ مہینے اسرائیل کی بے رحم فوجی طاقت اور ظالمانہ رویہ غزہ کو تباہ کر دینے کے باوجود عصبیت پسند حکومت اپنے مقصد میں بری طرح ناکام ہے۔ نام نہاد آپریشن پروٹیکٹیو ایج کی وجہ سے اسرائیل کو منہ کی کھانی پڑی ہے جیسا کہ 2006ء کی لبنان کے خلاف جنگ کے بعد ہوا تھا۔ فلسطینی بری طرح زخمی ہیں لیکن ٹوٹے نہیں ہیں۔ یہ وہ لوگ ہیں جو کسی بھی صورتحال کا سامنا کرنے کیلئے تیار رہتے ہیں۔

جیسا کہ پاکستان کے سابق فوجی سربراہ مرزا اسلم بیگ نے کہا کہ ’’اسرائیلی جنگ کا مقصد حماس کی شہری اور فوجی کمان کے منصوبے اور ان کے بہادر جنگجوؤں کو ختم کرنا ہے لیکن اسرائیلی فوجیں اپنا مقصد حاصل کرنے میں دس فیصد بھی کامیاب نہیں ہو سکی ہیں۔ اسی کو شکست کہتے ہیں۔ حماس کی فتح ہوئی ہے کیونکہ مدافعت کے نظریہ کو شکست نہیں دی جا سکتی۔‘‘

اس بات پر توجہ دلاتے ہوئے کہ یہ 2 غیر متناسب فریقین کے بیچ سخت جنگ تھی، جنرل بیگ پیش گوئی کرتے ہیں کہ مضبوط قوت ارادی کے حامل افراد ہی فتح مند ہوتے ہیں۔ قدرت بھی حماس کی مدد کرتی ہے جبکہ اسرائیل کی پوری دنیا مذمت کر رہی ہے۔‘‘ تو بھلے ہی فلسطینی مقامی سطح پر خود کو تنہا پاتے ہوں لیکن بڑے پیمانے پر عالمی برادری کے کم ازکم با شعور افراد ان کے ساتھ ہیں۔ غزہ والوں کیلئے بڑھتی حمایت عالمی پیمانے پر پچھلے کچھ ہفتوں میں دیکھی گئی ہے جو اس سے پہلے کبھی نظر نہیں آئی تھی۔ اسرائیل کے خلاف نفرت اپنے عروج پر ہے اور اسی آندھی میں ، نسلی بنیاد پر نا انصافی کے ذریعہ قائم کئے گئے اس ملک کے نابود ہو جانے کی پیش گوئی کی جا رہی ہے۔ جیسا کہ سخت گیر جنوبی افریقہ کے ساتھ ہوا تھا۔ پچھلے ہفتہ جنوبی امریکہ کے پانچ ممالک برازیل، چلی، ایکواڈور ، پیرو اور ایل سلواڈور نے ہمت کا مظاہرہ کرتے ہوئے غزہ کی حمایت میں مظاہرہ کیا اور اسرائیلی سفیر کو اپنے ملک سے نکال باہر کیا۔ قاہرہ میں واقع عرب پارلیمنٹ نے جنوبی امریکہ کے ممالک کا ان کے اقدام کیلئے شکریہ ادا کیا۔ اگر فلسطین کے تعلق سے یہ ہمدردی کچھ پہلے بیدار ہوگئی ہوتی تو اس کے کچھ خوشگوار نتائج برآمد ہو سکتے تھے۔ جیسا کہ مارٹن لوتھر کنگ جونئیر نے کہا تھا کہ آخر میں ہم دشمن کے الفاظ نہیں بلکہ دوست کی خاموشی یاد رکھیں گے۔ اسی دوران دنیا کی نظروں میں اسرائیل کو جنگ اور معرکہ آرائی دونوں میں شکست فاش ہوئی ہے۔ فلسطینی پارلیمنٹ کے الفاظ میں ’’ فلسطین نے برداشت کیا، مقابلہ کیا اور فتح حاصل کی۔‘‘ اور انہوں نے ساری پریشانیوں کے باوجود ہر مرحلے میں کامیابی حاصل کی ہے۔ آزادی اور مقابلہ آرائی کی روح ایک مرتبہ پھر ظلم و استبداد اور نو آبادیات کے خلاف کامیاب و کامران رہی ہے۔

بہ شکریہ روزنامہ ’’انقلاب 

The Ruins Of Gaza